అందం చీరలోనా... చీర కట్టిన చిన్నదానిలోనా

పొద్దున్నే అలా వస్తుంటే.. ఎక్కడ నుంచి వస్తున్నారో 18 నుంచి 22 ఏళ్ల మధ్య అమ్మాయిలు.. అచ్చ తెలుగు
అందాలు... చీరల్లో కనిపించారు. ఏదో పూలవనాన్ని చూసినట్టు.. అందాల పరిమళాలు మనసుని తాకినట్టు
ఝల్లుమంది. ఇదే విషయాన్ని మా ఆవిడకి చెప్పాను. కొరకొరగా చూసి... చీరల్లో నన్నెపుడూ ఇలా పొగడలేదే
అని కళ్లు చిట్లించింది. వాళ్ల అందం కాబట్టి మాటల్లో చెప్పగలిగాను.. నీ అందానికి మాటలు చాలొద్దూ.. అని
అప్పటికైతే తప్పించుకున్నాను గానీ.. మళ్లీ ఎందుకో చీర గురించి చిన్నపాటి గ్రంధమే రాయచ్చనిపించింది.
జిగిబిగి చీర ఎంత కొంటెదంటే.. ఎక్కడ ఏది దాయాలో.. ఎక్కడ గుట్టు విప్పాలో దానికే తెలుసు. అందాలన్నిటినీ చుట్టగా చుట్టేసి.. కుచ్చెళ్లలో దాచేసీ... భావాలెన్నో పలికించే.. ఊరించే చీర  కన్నా.. వాత్స్యాయనుడు ఏం గొప్పా.. ? నల్లంచు తెల్లచీరైనా.. తెల్లంచు నల్లచీరైనా... పైటంచు రెపరెపలకి.. గాలివాటానికి పోటీ పడితే... శ్రీనాధుడైనా కలం వదిలి కళ్లప్పగించాల్సిందే. కరిమబ్బుల్లో చందమామ దాపరికం ఎంత సేపూ...  మబ్బు తొలగగానే వెన్నెల మత్తు. చీర తెరలలో వయసు పున్నమి ఊసులు వెన్నెల కన్నా మత్తు. నచ్చిన నిచ్చెలి చీర కడితే బంధనంలో ఉండలేక బయట పడుతూ... మన్మధుని విల్లు కన్నా ఒంపులు పోయే నడుము... చెలికాడుకి సిగ్గుల నజారానా మరి. ఇంతకూ అందం చీరలో ఉందా... చీర కట్టిన చిన్నదానిలో ఉందా ? శ్రీనాధుడు ఓ రసభావోద్వేగంలో పేర్చిన ఓ అక్షరమాల గుర్తొస్తోంది. "మన్మధుని కొంప ఒక చెంప కనిపింప చీర కట్టి నడియెన్ చిగురుబోడి" అని తేల్చి చీర, చిన్నది రెండూ ఒకదానికొకటి పోటీనే అని చెప్పకనే చెప్పాడు. ప్రకృతిని ఒడిసి పడితే చీరలో చిన్నదాని ముందు చిన్నబోతుందేమో. అసలు అందం చూసే కళ్లను బట్టి ఉంటుందంటాడు జాన్ కీట్స్ మహాశయుడు. నిజమే.. పల్లెటూరి గట్లలో పడుచుల చీరకట్టులో పచ్చిక బయళ్లంత స్వచ్ఛమైన అందం. ఆలయంలో పడతి చీరకట్టు నైవేద్యం అంత పవిత్రం. పెళ్లి చూపుల్లో నులి సిగ్గుల్లో చీర చూపేది... బాపూ బొమ్మలోని రమణీయం. సుందర కావ్యం. తొలిరాత్రి వేళ చీర పెంచే గుండెవేగం... కాంతి వేగాన్ని మించిన ప్రేమోద్వేగం. ఎంతని చెప్పనూ.. ఏమని వర్ణించనూ.. సౌందర్య భావన మీదే ఎడతెగని గౌరవం పెంచే మన తెలుగు చీర ప్రపంచానికే కట్టూ బొట్టూ నేర్పిందంటే... అంతకు మించిన సౌందర్యం లేకనే కదా. చూడగానే చేతులెత్తి నమస్కరించే సంస్కారం నేర్పేదీ చీరే... మదిలో కొంటెకలల అలల అలజడి రేపేదీ చీరే.. అహో ఒక్క చీరతో ఎంత మాయ చేశావయా బ్రహ్మయ్యా. కాస్త కొంటెతనం... ఇంకాస్త చిలిపితనం... వద్దన్నా వినని అల్లరితనం... వీటన్నిటితో కలగలిసిన అందం... మొత్తంగా
కలిపితే చీరందం.